25. april 2002

UPA 2002/23

 

Folkehøjskolit pillugit Inatsisartut peqqussutissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

Aappassaaneerinermi saqqummiunneqartoq

 

Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Naimanngitsoq Petersen, Atassut, siulittaasoq
Inatsisartuni ilaasortaq Ruth Heilmann, Siumut, siulittaasup tullia
Inatsisartuni ilaasortaq Lars Karl Jensen, Siumut
Inatsisartuni ilaasortaq Olga Poulsen, Inuit Ataqatigiit
Inatsisartuni ilaasortaq Mogens Kleist, Kattusseqatigiit

 

Inatsisartut Kultureqarnermut Ilinniartitaanermullu Ataatsimiititaliaata UPA 2002-mi siuller-meerinerup kingorna siunnersuut nassuiaatitai ilanngullugit misissuataarpaa.

Siullermik ataatsimiititaliap isumaqatigiittup Folkehøjskolit pillugit Inatsisartut peqqussutaata 1980-imeersup nutarterneqarnera pitsaalluinnartutut isigaa.

Nunatsinni højskoliusut marluk ukiuni amerlaqisuni nunatsinni inuiaqatigiinnut ilinniartitaanerup kulturillu tungaasigut annertuumik tunniussaqarsimapput. Ilinniartitaanermi pissutsit ukiuni qaangiuttuni allannguuteqarsimapput, taamaattumillu inuiaqatigiinnut pingaaruteqarpoq højskolit aamma malinnaatinneqarnissaat.

Siunnersuut naapertorlugu ilinniarnersiuteqartitsinermut malittarisassat højskolini ilinniartut højskolimiinnermik nalaani ilinniarnersiuteqarsinnaasunngorlugit allanngortinneqarput. Taamaalilluni ataatsimiititaliamit iluarisimaarneqarpoq peqqussutissatut siunnersuutip kingunerissammagu inuusuttut amerlanerusut højskoleriarnissaminnut periarfissaqalernerat, tassami kommunit ataasiakkaat aningasaqarniarnermikkut pisinnaasaat apeqqutaajunnaartussaammata.

Ataatsimiititaliattaaq nuannaarutigalugu paasivaa højskolini marluusuni timersornermut tunngasunik, nipilersornermik ilinniartitsinermik kiisalu eqqumiitsuliornermik ilinniartitsinermik ingerlatsisoqarsinnaanissaa oqaluuserineqarsimasoq. Tamatuma saniatigut inuusuttut ilinniagaqarniartut ilinnialernissamut piukkunnarsarlutik nukittorsarneqarnissaannut højskolit atorneqarsinnaanerat eqqarsaatersuutigineqarsimavoq. Iliuuserineqarsinnaasutut periarfissat tamakku tamarmik peqqussutissatut siunnersuummi eqqarsaatigineqarsimanerat ataatsimiititaliap iluarinartuutippaa.

Tamanna tunngavigalugu ataatsimiititaliap isumaqatigiittup inassutigaa Naalakkersuisut siunnersuutaat Inatsisartunit taperserneqassasoq.

Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.

 

	Naimanngitsoq Petersen, Atassut, Siulittaasoq
Ruth Heilmann, Siumut, Siulittaasup tullia		Lars Karl Jensen, Siumut
Olga Poulsen, Inuit Ataqatigiit		Mogens Kleist, Kattusseqatigiit